తెలంగాణ ప్రభుత్వం ప్రతిష్టాత్మకంగా తీసుకురాబోతున్న ఇందిరమ్మ కుటుంబ జీవిత బీమా పథకం ఎవరికి వస్తుంది, ఎవరికి రాదు అనే అంశంపై ప్రస్తుతం రాష్ట్రవ్యాప్తంగా తీవ్ర చర్చ జరుగుతోంది. అయితే జూన్ నుంచి ఈ పథకాన్ని అమల్లోకి తీసుకొచ్చేందుకు సిద్ధమైన ప్రభుత్వం అర్హులను గుర్తించేందుకు ఓ సర్వే చేపట్టింది. అసర్వే ఆధారంగానే అర్హులైన 1.15కోట్ల కుటుంబాలకు పథకాన్ని వర్తింప చేస్తున్నట్టు ప్రకటించింది. ఇంతకూ ఆ సర్వే ఏంటి, అర్హులు ఎవరో తెలుసుకుందాం.
రాష్ట్రంలోని పేద కుటుంబాలకు భద్రతను కల్పించేందుకు తెలంగాణ సర్కార్ ఇందిరమ్మ జీవిత బీమా అనే సరికొత్త పథకాన్ని తీసుకురానుంది. ఈ ఏడాది జూన్ నుంచి ఈ పథకాన్ని అమలు చేసేందుకు అన్ని సిద్ధం చేస్తోంది.ఈ పథకం కోసం ఈ ఆర్థిక బడ్జేట్లో రూ.4వేల కోట్ల నిధులను కూడా కేటాయించింది. అయితే ప్రస్తుత రాష్ట్రంలో అమలవుతున్న రైతు బీమా పథకం మాదిరిగానే ఈ పథకాన్ని అమలు చేయనున్నట్టు తెలుస్తోంది. ప్రమాదశాత్తు లేదా అనారోగ్యం కారణంగా ఏ కుటుంబమైతే ఇంటి పెద్దను కోల్పోతుందో వారికి ఈ పథకాన్ని వర్తింప చేయనున్నట్టు తెలుస్తోంది. కుటుంబ పెద్దను కోల్పోయిన ఫ్యామిలీలకు భరోసాను ఇచ్చేందుకు ఈ పథకాన్ని తీసుకొచ్చినట్టు ప్రభుత్వ వర్గాలు చెబుతున్నాయి.
అయితే ఈ పథకానికి అర్హుల ఎవరనే అంశంపై సీఎం రేవంత్ రెడ్డి క్లారిటీ ఇచ్చారు. సామాజిక, ఆర్థిక, విద్య, ఉపాధి, రాజకీయ, కుల సర్వేలో అర్హులుగా తేలిన కుటుంబాలన్నింటికీ ఈ పథకాన్ని వర్తింపజేయనున్నట్టు పేర్కొన్నారు. ప్రభుత్వం అధికారంలోకి వచ్చిన వెంటనే రాష్ట్రంలోని వెనుకబడిన తరగతులు, అణగారిన వర్గాలకు గుర్తించేందుకు ఈ సర్వే నిర్వహించారు. ఈ సర్వేలో సుమారు 1.15 కోట్ల మంది లబ్ధిదారులను గుర్తించారు. ప్రస్తుతం ఈ సర్వే ఆధారంగానే ఇందిరమ్మ కుటుంబ జీవిత బీమా పథకాన్ని అమలు చేయనున్నారు.
అయితే ఈ పథకం కోసం బడ్జెట్లో ప్రభుత్వం రూ.4వేల కోట్లు కేటాయించింది. అలాగే రాష్ట్ర వ్యాప్తంగా సుమారు కోటి 15 లక్షల కుటుంబాలకు ఈ పథకాన్ని అమలు చేయనున్నట్టు పేర్కొంది. రేషన్ కార్డు ఉన్నవారికి మాత్రమే ఈ పథకం వర్తిస్తుందని తెలుస్తోంది. గత ప్రభుత్వం నుంచి మహిళల పేరిటే రేషన్ కార్డులనూ జారీ చేస్తూ వచ్చారు. అప్పుడు కుటుంబ పెద్దలుగా మహిళలే ఉంటారు. అయితే మరి ఈ పథకం కుటుంబ పెద్దగా ఉన్న మహిళలకు మాత్రమే వర్తిస్తుందా, లేదా పురుషులకు కూడా వర్తిస్తుందా అనేది క్లారిటీ రావాల్సి ఉంది.
