వినాయకచవితి వచ్చిందటే చాలు వీధివీధినా రకరకాల గణనాథుడి విగ్రహాలు దర్శనమిస్తాయి. ప్రతి వీధిలో విభిన్న రకాల వినాయకులు కనువిందు చేస్తాయి. విగ్రహాలను ప్రతిష్టించేందుకు నిర్వాహకులు మండపాలను ప్రత్యేకంగా అలంకరిస్తారు. ఈ అలంకరణలు జనాలను ప్రత్యేకంగా ఆకర్షిస్తాయి. అయితే విజయనగరం జిల్లాలో నిర్మించిన డెబ్బై అడుగుల ఎత్తున ఈఫిల్ టవర్ వినాయక మండపం కూడా ప్రస్తుతం అందరినీ ఆకర్షిస్తుంది.
విజయనగరం జిల్లా రాజాం మున్సిపాలిటీలోని పొనుగుటివలస గ్రామం వినాయకచవితి ఉత్సవాలకు ప్రసిద్ధి. ఈ గ్రామస్తులు నిర్వహించే వినాయకచవితి ఉత్తరాంధ్రలోనే ప్రత్యేక ఆకర్షణగా నిలుస్తుంది. ఎందుకంటే ఈ గ్రామస్తులు వినాయక చవితి సందర్భంగా ప్రతి సంవత్సరం వినూత్న మండపాలతో భక్తులను ఆశ్చర్యపరుస్తారు. గత సంవత్సరాల్లో జల వినాయక మండపం, టైటానిక్ షిప్ నమూనా, చంద్రయాన్-2 రాకెట్ మోడల్ వంటి అద్భుత నిర్మాణాలు చేశారు. జల వినాయక మండపం అంటే నీటి మధ్యలో గణేశుడిని ప్రతిష్ఠించి భక్తులు బోట్లలో వెళ్లి దర్శనం చేసుకునేలా రూపొందించారు. టైటానిక్ షిప్ మండపం సముద్ర యాత్రలా అనిపించేలా లైటింగ్‌తో అలంకరించారు.చంద్రయాన్-2 రాకెట్ నమూనా ఇస్రో మిషన్‌ను గుర్తుచేస్తూ అంతరిక్ష థీమ్‌తో ఆకట్టుకుంది.
ఈ క్రమంలోనే ఈ ఏడాది తయారు చేసిన ఈఫిల్ టవర్ మండపం కూడా రాత్రి సమయంలో లైట్లతో మెరుస్తూ ప్యారిస్‌లోని టవర్‌ను తలపిస్తూ అందరినీ ఆకర్షిస్తుంది. ఫ్రాన్స్‌లోని ప్రసిద్ధ ఈఫిల్ టవర్‌ను అనుసరించి రూపొందించిన ఈ మండపం స్క్రాప్ మెటీరియల్‌తో తక్కువ బడ్జెట్‌లో తయారు చేశారు. ఇనుము రాడ్లు, పాత మెటల్ షీట్లు, రీసైకిల్ చేసిన పదార్థాలతో ఈ నిర్మాణం సాగింది. గ్రామస్థులు రాత్రింబవళ్లు కష్టపడి వినూత్న డిజైన్‌తో ఈ మండపాన్ని సిద్ధం చేశారు.
ఈ టవర్ క్రింద ఉయ్యాల ఊగుతున్న వినాయకుడిని ఏర్పాటు చేశారు. గ్రామ యువత ఆధ్వర్యంలో నిర్మించిన ఈ 70 అడుగుల ఈఫిల్ టవర్ ఆకారంలోని వినాయక మండపంలో ఆసీనులైన వినాయకుడిని దర్శించుకునేందుకు చుట్టుపక్కల గ్రామాల నుంచి పెద్దఎత్తున భక్తులు తరలివస్తున్నారు. ప్రతి ఏటా జరిగే వినాయక చవితిని గ్రామయువత అయిన రాజేష్, సురేష్, రాముతో పాటు మరికొందరు ఈ ప్రాజెక్ట్‌కు నాయకత్వం వహిస్తారు.
తమ గ్రామ ప్రత్యేకతను ప్రపంచ స్థాయికి తీసుకెళ్లాలనే ఉద్దేశంతోనే తక్కువ ఖర్చుతో పర్యావరణ హితంగా స్క్రాప్ మెటీరియల్ ఉపయోగించి ఈ ఈఫిల్ టవర్ నిర్మాణం చేశామని తెలియజేశారు గ్రామయువకులు. మండపం లోపల గణేశుడి విగ్రహం ప్రతిష్ఠించి, పూజలు, సాంస్కృతిక కార్యక్రమాలు నిర్వహిస్తున్నారు. చుట్టుపక్కల గ్రామాల నుంచి వచ్చిన భక్తులు, ఈ వినూత్న డిజైన్‌ను చూసి ముగ్ధులవుతున్నారు. పిల్లలు, యువత ఫోటోలు దిగుతూ సంబరాలు చేసుకుంటున్నారు.
